ዳኛውን ህሊናው ሲረታው !

ድባብ መናፈሻ ውስጥ ከ አንድ ጓደኛዬ ጋር ወግ ይዘናል::ለዛ ባላቸው ቀልዶች እያዋዛ ቁምነገር

ስለሚያቀብለኝ ከዚህ ሰው ጋር ጊዜ መውሰዱ ያስደስተኝ ነበር:: ታዲያ በዚህ ቀን ስለሆነ ስለሆነ ነገር

ስናወጋ አንድ ከልብ የሚቀር ታሪክ አጫወተኝ::በርግጥ ስለ ታሪኩ ርግጠኝነት አጥብቄ መጠየቅ

አልፈለኩም በውስጡ ያለው የተዛምዶ ትምህርት አሳስቶኝ ነበርና::

ታሪኩ እንዲህ ነው::አንድ የእግር ኳስ ዳኛ ሁለት ተፎካካሪ ቡድኖችን በመሃል ዳኝነት ይመራ

ይዟል::በጨዋታው መሃል የአንደኛው ቡድን አጥቂዎች ወደ ተቃራኒው ቡድን የግብ ክልል አካባቢ

ደረሱ::በመሃልም የተቃራኒው ቡድን ተከላካይ ኳሷን ከአጥቂው ለማስጣል ይንሸራተት እና ኳሷን

ይነጥቃል::መነጠቁን ያወቀው አጥቂ ተጠልፎ እንደወደቀ አስመስሎ ይወድቃል::ይንፈራፈራል::ዳኛው

ምንም እንዳልተጠለፈ በሚገባ ቢያይም ባልገባው ድንገተኛ ስሜት ፊሽካ አጮኸ::ተጣድፎም ፍጹም

ቅጣት ምት እንዲመቱ አደረገ::ያ ያጭበረበረው አጥቂ ቅጣት ምቱን መታና ግብ ተቆጠረ::በ አጭበርባሪው

ወገን ሆታ በ ተቃራኒው ወገን አዘን ረበበ::

በደል የደረሰባቸው ተጫዋቾች ጥቂት የተሟገቱ ቢሆንም ዳኛው ስለወሰነ ምንም ማድረግ አልቻሉም::

ጨዋታው ቀጠለ::የመሃል ዳኛው ባላወቀው ስሜት የፈጸመው በደል ከወዲያ ወዲህ እየሮጠም

አለቀቀውም::ጥፋቱ ህሊናውን እየከሰሰው ነው::

አሁንም ኳስ በነዚያ ግብ በገባባቸው ቡድኖች የግብ ክልል አካባቢ ትገኛለች:: አንድ ሁለት አንድ ሁለት

ተቀባበሉ::ተከላካይ በቅብብሎሹ መሃል ዘሎ ኳስ አጨነገፈ::ይሁን እንጂ ማጭበርበር የለመዱት እና

የዳኛውን አለመረጋጋት ያዩት አጥቂዎች ባንዴ እጃቸውን አወጡ::ማኖ......::የመጀመሪያው ስህተት

አይምሮውን እየወቀረው ያለው ዳኛ አልተረጋጋም ሌላ ስህተት ሊደግም ነው::ፊሽካ በረጅሙ አሰማና

የሁለተኛ ቅጣት ምት እንዲመቱ አዘዘ::ለሁለተኛ ጊዜ በደል የደረሰባቸው ተጫዋቾች ዳኛውን ከበው

ጠየቁት::ዳኛው የሁለተኛው ውሳኔውም ስህተት እንደነበር ወዲያው ፊሽካ ካሰማ በሁዋላ አውቋል ይሁን

እንጂ አንዴ ፊሽካ አስምቻለሁ ብሎ በውሳኔው ጸና::ቅጣት ምቱ ተመታ:: ሁለተኛ ግብ ተቆጠረ::

ዳኛው በመደናገር የፈጸማቸው ስህተቶች አእምሮውን ይጠዘጥዙት ይዘዋል::በደል የተፈጸመባቸው

ተጫዋቾች ተስፋ ባለመቁረጥ ደፋ ቀና ማለታቸውን ሲያይ አዘነ መሰል::ሰአቱ ገፋ::በ አግቢዎቹ መንደር

ሆታ ና ድል ሲዘፈን በተበዳዮች ደጋፊዎች ዘንድ ተስፋ መነመነች::ለጨዋታው የተመደበው ጊዜ ሊያልቅ

ነው::በትልቁ ስክሪን ላይ የቀሩት ሁለት ደቂቃዎች ብቻ መሆናቸው እንደታየ ያልተለመደ የፊሽካ ድምጽ

ዳኛው አሰማ::በ አግቢዎች ዘንድ ለቅጽበት ዝላይ ሆነ የተበዳይ ደጋፊዎች ደግሞ "ሰአት ሰአት ሰአት"

ጩኸት ሆነ::ይህ ሁሉ ለቅጽበት ነበር:: ዻኛው ልክ በእጅ መስታወት ፊታችንን እንደምናይ ቀይ ካርድ

አውጥቶ ለራሱ ያያል::ለጥቂት ሰከንዶች ቀይ ካርዱን ለራሱ ካሳየ በሁዋላ::ሜዳውን ሰንጥቆ ወጣ::ግራ

መጋባት በስቴዲየሙ ዙሪያ ደበበ:: አራጋቢዎች ሮጠው ተጠጉት::ለሁለቱም ቀይ ካርዱን አሻራቸው::ግራ

መጋባቱ በስቴድየሙ መላ::

ብዙ ተጫዋቾች እና አሰልጣኞች ዳኛው ወዳመራበት ተሯሯጡ::ከ ጥቂት ግራመጋባት በሁዋላ::በድምጽ

ማጉያ እንዲህ ተለፈፈ::

“ዻኛው ባልተለመደ ሁኔታ ለራሳቸው እና ለ አራጋቢዎቻቸው ቀይ ካርድ አሳይተው ጨዋታውን

አቋርጠዋል::ተመልካቾች በተፈጠረው ሁኔታ ይቅርታ እየጠየቅን የዛሬው ጨዋታ በዚሁ ተቋርጧል ስለዚህ

ሰሞኑን የፌደረሽኑ ወሳኔ ስለሚገለጽ በሚዲያ እንድትከታተሉ በአክብሮት እንጠይቃለን::”ተመልካች እርስ

በርሱ ስለተፈጠረው አስገራሚ ነገር ያወጋል::ግማሹ ዳኛውን ያደንቃል::ግማሹ ይገረማል::

ከቀን በሁዋላ ፌደረሽኑ ጨዋታው እንዲደገም እና ሌላ ዳኛ ጨዋታውን እንዲመራው በመወሰኑ እነዚያ

ተቃራኒ ቡድኖች ፍልሚያ ገቡ::ጥሩ ተጫውተው እነዚያ በደል የተፈጸመባቸው ተጫዋቾች ሶስት ለባዶ

ረተው ገቡ::ያ ለራሱ እና ለ አራጋቢዎቹ ቀይ የሰጠው ዳኛ ቃለ መጠይቅ ተደርጎለት እንዲህ አለ::

"የወሰድኩት ርምጃ ትክክል ነበር::ሃጥያቴም ታጠበልኝ::"

ይሄ ጓደኛዬ ይህን ካጫወተኝ በሁዋላ በረጅሙ ተንፍሶ እንዴው በሁሉም መስክ እንዲህ ያሉ ጀግኖች

ቢኖሩ እንዴት መልካም ነበር? ብሎ አስደመመኝ::

                                                        

                                                     ገለታው ዘለቀ

geletawzeleke@gmail.com__